حكايات جحا المعاصر

بسم الله الرحمن الرحيم

حكايات جحا المعاصر

تحياتي يا ساده يا كرام , جلست وفكرت ماذا لو كان جحا يعيش بيننا بأشكال مختلفه ووظائف مختلفه فأحببت أن أختلق هذه الشخصيه الهزليه لنتشارك سويا افراحها وأتراحها ونقترب منها ونعيش معها لحظه بلحظه هل انتم مستعدون لخوض هذه التجربه معي ,انت يا من تجلس هناك هل توافق بأن تعيش مع جحا الاردني المعاصر اذا تعالوا نبدأ بسم الله .
جحا سباك مواسير
جحا ينادي الصبي , تعال يا لقمه احمل صندوق العده وحطه بالسيارة في ورشه لازم نروح عليها , لقمه حاضر يا معلم , جحا يحضرلك الخير , يصل جحا الى الورشه يقابل صاحب الورشه طبعا كشره لا مثيل لها المتر مشبوك بالحزام بنطلون جينز اكل الدهر عليه وشرب , قميص برتقالي من عصر الهكسوس , لا تسألوني شو يعني هكسوس لأني ما بعرف بس هيك بسمعهم بحكوا , عيونه حمر مثل الدم سهران طول الليل على القهوة يلعب طرنيب , ولك لقمه بتعرف مبارح طول الليل ما نمت , لقمه ليش يا معلمي , اخ اولاد هالشلن طول الليل يفقعوا في غلوب عمو ضوي , والله ماني شايف قدامي , حتى تطلع بعيوني شوف شو شايف , لقمه وين عيونك يا معلمي انا اصلا مش شايفهن , اه مش قلتلك يا لقمه عمو ضوي , اخ بس لو كنت قاعد على القهوه معانا وشفت بالأول كيف كنت ديك والله معلمك كان ديك وبعد شوي قلبت الدنيا علي ولك والله ما بعرف كيف انقلب حظي والله يا لقمه فرخت بعد ما كنت ديك , بس بسيطه انا بورجيهم والله لأخليهم يتندموا ويحرموا يمسكوا الشده , لقمه ايوه يا معلمي بس يا ريت كنت معاك كان فرجيتك فيهم , جحا ولك تفرجي مين بهالكف وبتتساير معي كمان روح اركض جيب العده خلينا نشوف شغلنا قال بفرجيهم قال , صاحب الورشه ينظر اليهم بتعجب , بس شو عن جد جحا معلم سباك درجه أولى اكثر من نص دير غبار هو الي مستلمها ومشتغلها واذا مش مصدقين أسألوا عنه , دخل جحا العماره طلع المتر وأخذ يقيس يمين يسار أها , خلاص كل شي تحت السيطره , صاحب الورشه شو هو الي تحت السيطره , جحا لا ولا شي بس القياسات مزبوطه 100% , صاحب الورشه اه منيح , طيب اكتبلي شو الأغراض الي بتلزمك علشان اشتريها , جحا ولك لقمه تعال لهون , جيب الدفتر وقلم الرصاص وابريه مبارح كان مش مبري , ماشي يا معلمي بس كيف ابريه مافي برايه , بهالكف طراخ ولك ومين قلك قلم الرصاص بده برايه ولك بتمك يا بقره ولا ما بتفهم تبري قلام كمان , ولك بتعرف انا البقره الي شغلت واحد مثلك ولك شوف صبي ابو جسار ما شاء الله عليه مخلص سادس ب ولا في بعده مش مثلك محو اميه ومش فالح فيها كمان الله يسقطك من بين الصبيان , وين أيامنا لمن كنت صبي عند معلمي ابو حيدر كان يلطشني هذاك الكف ادير خدي الثاني واقول اضرب علمني يا معلم علمني انا تحت أمرك يا معلم , مش مثلك بلطشك الكف بتقعد تنافخ , معلش يامعلمي سامحني برضه انا لقمه تلميذك , والله يا لقمه غلب مبارح مش طالع من نخاشيشي , حاسس الغلب كابس على رقبتي بدي انخنق يا لقمه , سلامتك معلمي انا ولا انت , اه والله يا لقمه انت ولا انا , اه هيك بدي اياك لازم تحب معلمك علشان يعلمك الصنعه يشربك اياها شرب , اخ الله يرحمك يا ابو حيدر كيف طعميتني الصنعه بالمعلقه , ولك وين القلم والدفتر , هيهن يا معلمي , أكتب شو اكتب هو انا بعرف اكتب , اه كمان ما بتعرف تكتب والله حلو انت مين عينك عندي مين واسطتك , خالتي أم العبد كلمت زوجتك وهي الي عينتني , زوجتي اه وانا عمال اقول ليش مبارح كنت بدي اطلقها هذا انت السبب اسمع ترى خطية هالمرأه برقبتك اذا طلقت بسببك , لقمه ماشي يا معلمي , جحا اسمع يا عمي انا بقلك وانت سجل , صاحب الورشه ماشي تفضل , كوع نص انش عشرين ونص , ولك كيف ونص من وين جبتها , ممكن نحتاج النص للمنور بس انت سجل , ماشي اه وشو كمان , ماسوره نص انش خليني اشوف ضرب بعيونه الحمر هيك وهيك وقال جيب عشرين الي بزيد بروحو معي مش مشكله بنبيعه انا ولقمه , المهم الرجال صاحب البيت يسجل وجحا يصدح , خلص جحا المواد الرجال راح يجيب الأغراض جحا دخل غرفه فاضيه وحط راسه بده ينام تذكر انه لازم لقمه يحفر الحيطان قام رسم رسم على الحيطان وقال يالله حفر , وراح بده ينام , ولك لقمه , لقمه يركض نعم معلمي , جحا انت ما بتفهم , ليش يا معلمي , ولك دق شوي شوي بدي اعرف انام , يعني يا معلمي احسس تحسيس , اه حسس تحسيس , وغط جحا في نوم عميق , واثناء نومه قفز مصروعا ولك طرنبها طرنبها , فزع لقمه خير يا معلمي شو هي الي يطرنبها , جحا بنت الكبه , لقمه يهز برأسه ويقول سلامات يا معلمي سلامات وعاد جحا الي نوم عميق أخر , احلام سعيده يا جحا القرن الواحد والعشرين .
ولنا لقاء اخر مع حكايات جحا المعاصر
وتقبلوا تحياتي
هشام أبو عمر

رمز المشاعر

هذا لإنك انسانه رقيقه ورائعه والجميل يرى الكون جميل , شكرا على هذا الإطراء وبارك الله بك وفتح ابواب النجاح أمام ناظريكي
تقبلي ودي ووردي

هشام ابو عمر

ابداع ادبي رائع تحياتي ابو عمر

سيناريو ممتاز تشكر عليه