على اسم مصر ... للرائع صلاح جاهين

[ندعوك للتسجيل في المنتدى أو التعريف بنفسك لمعاينة هذا الرابط]

النخل في العالي والنيل ماشي طوالي

[b]معكوسة فيه الصـور .. مقلوبة وانا مالي

[b]يا ولاد أنا ف حالي زي النقش في العواميد

[b]زي الهلال اللي فوق مدنة بنوها عبيد

[b]وزي باقي العبيد باجري على عيالي

[b]باجري وخطوي وئيد من تقل أحمالي

[b]محنيه قامتي .. وهامتي كأن فيها حديد

[b]وعينيا رمل العريش فيها وملح رشيد

[b]لكني بافتحها زي اللي اتولدت من جديد

[b]على اسم مصر.

[b]
[b]مصر .. التلات أحرف الساكنة اللي شاحنة ضجيج

[b]زوم الهوا وطقش موج البحر لما يهيج

[b]وعجيج حوافر خيول بتجر زغروطة

[b]حزمة نغم صعب داخلة مسامعي مقروطة

[b]في مسامي مضغوطه مع دمي لها تعاريج

[b]ترع وقنوات سقت من جسمي كل نسيج

[b]وجميع خيوط النسيج على نبرة مربوطة

[b]اسمعها مهموسة والا اسمعها مشخوطه

[b]شبكة رادار قلبي جوه ضلوعي مضبوطة

[b]على اسم مصر.

[b]
[b]وترن من تاني نفس النبرة في وداني

[b]ومؤشر الفرحة يتحرك في وجداني

[b]وأغاني واحشاني باتذكرها ما لهاش عد

[b]فيه شيء حصل أو بيحصل أوح يحصل جد

[b]أو ربما الأمر حالة وجد واخداني

[b]انا اللي ياما الهوى جابني ووداني

[b]وكلام على لساني جاني لابد اقوله لحد

[b]القمح ليه إسمه قمح اليوم وأمس وغد

[b]ومصر يحرم عليها .. والجدال يشتد

[b]على اسم مصر.

[b]
[b]ولما زماني رماني عليل

[b]نسيت كل شيء عن حبيبي الجميل

[b]لكن هو أبداً

[b]انا مانساهوش

[b]نسيت مشيته وصوته كان شكله إيه

[b]ورسمة شفايفه

[b]ولمسة إيديه

[b]نسيت نظراته

[b]نسيت لون عينيه

[b]وقوس الحواجب وسهم الرموش

[b]لكن هو أبداً

[b]انا ما انساهوش

[b]نسيت إسمه وحكايته وعرفته فين

[b]وعشنا سوى العمر

[b]والا يومين

[b]وكان م البشر

[b]والا طير بجناحين

[b]نسيت حتى كان له وجود أو مالوش

[b]لكين هو أبداً

[b]أنا ما انساهوش

[b]قطعوا الأغاني وطارت نشرة الأخبار

[b]دارت على كل دار في الكوكب الدوار

[b]يا حاضرين اعلموا الغايبين بأنه في مصر

[b]اتغير الاسم منذ الآن فأصبح .. مصر

[b]ضحك التاريخ ضحكته المشهور بها واندار

[b]ودخل مناقشة مع الجغرافيا عما صار

[b]هل نعترف بالبيان اللي أذيع العصر

[b]أم ننتظر مصر تطرد اسرائيل بالقسر

[b]وساعتها تحصل بكل جدارة يوم النصر

[b]على اسم مصر.

[b]
[b]على اسم مصر التاريخ يقدر يقول ما شاء

[b]أنا مصر عندي أحب وأجمل الأشياء

[b]باحبها وهي مالكه الأرض شرق وغرب

[b]وباحبها وهي مرميه جريحة حرب

[b]باحبها بعنف وبرقة وعلى استحياء

[b]واكرهها وألعن أبوها بعشق زي الداء

[b]واسيبها واطفش في درب وتبقى هي ف درب

[b]وتلتفت تلقيني جنبها في الكرب

[b]والنبض ينفض عروقي بألف نغمة وضرب

[b]على اسم مصر.

[b]
[b]مصر النسيم في الليالي وبياعين الفل

[b]ومرايه بهتانة ع القهوة .. أزورها .. واطل

[b]القى النديم طل من مطرح منا طليت

[b]والقاها برواز معلق عندنا في البيت

[b]فيه القمر مصطفى كامل حبيب الكل

[b]المصري باشا بشواربه اللي ما عرفوا الذل

[b]ومصر فوق في الفراندة واسمها جولييت

[b]ولما جيت بعد روميو بربع قرن بكيت

[b]ومسحت دموعي في كمي ومن ساعتها وعيت

[b]على اسم مصر.

[b]
[b]مصر السما الفزدقي وعصافير معدية

[b]والقلة مملية ع الشباك .. مندية

[b]والجد قاعد مربع يقرا في الجرنال

[b]الكاتب المصري ذاته مندمج في مقال

[b]ومصر قدامه اكتر كلمة مقرية

[b]قريتها من قبل ما اكتب اسمي بإيديا

[b]ورسمتها في الخيال على أبدع الأشكال

[b]ونزلت أيام صبايا طفت كل مجال

[b]زي المنادي وفؤادي يرتجف بجلال

[b]على اسم مصر.

[b]
[b]رحـيـلاً رحـيـلاً بغيـر هـوادة

[b]رحـيلاً فإن الـرحـيل سعـادة

[b]عبادة

[b]إرادة

[b]سيادة

[b]ولادة

[b]رحـيـلا .. إلى أين لـيس يـهـم

[b]ولـيس يـهـم بأي وسيـلة ..

[b]أجيـراً بلقمـتـه في البـواخـر ..

[b]عـلى واحـد من جيـاد القبيلة ..

[b]على مقعـد في ذرى الجـو فـاخـر

[b]وتمـلأ الكـأس بنت جمـيلة ..

[b]على قدمي .. أو بفكري .. أهاجر

[b]أبادر

[b]أغادر

[b]أخاطر

[b]أسافر

[b] ر.

[/size][/center]

حصان عرابي جميل حصان عرابي أصيل

حصان عرابي رشيق ديله طويل

يسهر مع الخيل طول الليل يتكلم

ويقول أراء رغم إنه ماكانش متعلم

ويقف في عابدين وياخذ زاوية البروفيل

للرسامين يرسموه ونشوفه جيل ورا جيل

ويعدي كالريح على المجاريح ويسلم

وحافره ع الصخر في التل الكبير علم

ولما صابه انفجار القنبلة اتالم

على اسم مصر.

والمس حجارة الطوابي وادق بكعابي

يرجع لي صوت الصدى يفكرني بعذابي

يا ميت ندامة على أمة بلا جماهير

ثورتها يعملها جيشها ومالها غيره نصير

والشعب يرقص كأنه عجوز متصابي

إنهض من القبر احكي القصة يا عرابي

يطل لي رافع الطهطاوي م التصاوير

شاحب ومجروح في قلبه وجرح قلبه خطير

وعيونه مغرورقين بيصبوا دمع غزير

على اسم مصر.

مالك سلامتك بتبكي ليه يا طهطاوي

قال لك عرابي .. انكسر بسلاح أوروباوي

وسلاح أوروبا ماهواش المدافع بس

ده فكر ناقد مميز للثمين والغث

قلناها ميت ألف مرة ألف مرة بصوت جهير داوي

بس الحماقة لاليها طبيب ولا مداوي

ولا حد م الخلق بالخطر اللي داخل حس

الغفلانين اللي خلوا العقل صابه مس

قالوا الخطر هو فكر أوروبا لو يندس

على اسم مصر.

أحسنت في القول صحيح يا ولد يا متنبي

جبت اللي جوه الفؤاد عن مصر متعبى

وحكمت بالعدل لكن بعضنا انظلموا

" يا أمة ضحكت من جهلها الأمم "

العلم كان عندنا من صغره متربي

لكنه هاجر وعدى البحر متخبي

لما الإيران هجموا ثم اليونان هجموا

ثم الرومان دمروا ثم التتار هدموا

ثم الجميع كل واحد جه مسح قدمه

على اسم مصر.

أيها الديك رفيع الموضع

يا صفيحاً فوق مسمار يدور

صف لنا فعل الرياح الأربع

قل لنا .. لو كنت تدري ما يدور

قال صه . فالآن ريح الشرق جاءت

تحمل الضوضاء من سوق المزاد

وتغني دون لحن كيف شاءت

أنا ريح الشرق أدعى شهرزاد

أنا أحكي ثم أحكي ثم أحكي

وأمامي السيف كالعشب يميل

وبكائي يتساوى مع ضحكي

طالما كان بأسلوب جميل

ثم ها قد أرسل الغرب رياحه

تزكم الأنف برائحة عجب

وتغني كبغى في مناحة

أنا ريح الغرب لوني كالذهب

أنا صفراء برمل الصحراء

أدفن الخضرة تحتي دون رحمه

أوصدوا الباب بوجهي الحقراء

حسنا فلتصبح القرية فخمة

ثم ها قد اقبلت ريح الجنوب

بدخان الدهن تسري عابقة

وتغني انني أدعي الهبوب

أنا سوداء كبئر المشنقة

أنا سوداء كأفعى هائلة

كرماد النوم ينثر في العيون

كالعرايا في المروج الموحلة

سعداء .. تعساء ..يرقصون

وتأنى برهة ديك الصفيح

يلقط الأنفاس وهو يترنح

دائراً دورته مع كل ريح

وأخيراً صاح كالأسد المجنح

هللويا ..أقبلت ريح الشمال

في غلالات رقاق راعشه

وهي تشدو بحنو ودلال

ها أنا ريح الشمال المنعشة

إنني وردية مثل العسل

ديدمونا .. هكذا يدعونني

قد عبرت البحر يحدوني الأمل

لعطيل أسمر ..

يخنقني !

ومضى ديك الرياح في دعه

من يمين ليسار يتذبذب

وبدا اضحوكة وإمعه

وهو مصلوب شهيد يتعذب

وعلى رأي المثل

الديك الصفيح

بيدوخ ويا الريح

والديك الصفيح

م البيضه بيصيح

ويقول بالصريح

الفكر فوق في الشمال يا الله الحقوه يا ولاد

لحقوه ولاد من ولاد الأغنيا الأسياد

وهم راجعين رموه في الباخرة في البحر

ونزلوا حكموا في ظل الانجليز والقصر

ومصر في الشمس بتغربل كلام منعاد

عن ابن بنت ابن حنت وطارق ابن زياد

والانجليز راضية بالخطباء وخطب الفخر

خطيب يهز الرؤوس وخطيب يهز الخصر

وخطيب يموت موتة الأبطال قتيل القهر

على اسم مصر.

والانجليز معجبين بمراسم التأبين

مات مصطفى كامل اتملت البلد صواوين

والمشرقين شوقي جابهم لجل يبكوا عليه

آه لو عرف هم إيه دلوقت وبقم إيه

المشرق الأولاني هو شعب الصين

هزم التخلف بتنظيم اشتراكي رصين

تنظيم يروح اللومان على طول كده برجليه

والمشرق التاني ينحط الحديد في إيديه

مليون شهيد يعني ثورة تخض شوقي بيه

على اسم مصر.

هل مصر موميا جميلة صورتها فوق النعش

يعشقها مجنون ينادي عليها ولا تطلعش

هل مصر نار صفصفت والنفخ فيها محال

والأرض نشعت على رمادها استحال أوصال

سألت أنا الرافعي كان عجٌز ولا بيسمعش

لكن عينيه كانوا يحكولي قصص ما اشبعش

يقولولي ماتخافش مصر بخير وعال العال

مصر الجبرتي ومصر الرافعي حال غير الحال

انظر محمد فريد أعظم وأرقى مثال

على اسم مصر

خذ الكتاب في يمينك وانظر الترقيم

عند المحبة وعند الموت في حرف الميم

تلقى محمد فريد بينهم مقيم ع العهد

وتلقى وجهه المدوٌر زي قرص الشهد

مليان حماسة وكياسة وجدعنه وتصميم

على إيه مصمم؟ .. يسهٌم زي كل زعيم

ويقول على الثورة اللي وأدوا ثورته في المهد

أنا بابني في السر شيء صعب المنال كالفهد

على اسم مصر.

محلول مركز من السكر في كباية

وف قلبه خيط يتلضم حباية حبايه

سكر نبات بللورات الماظ بتضوي ضي

وتفضل الألماظات تكبر شوي شوي

لحد ما العقد يبقى في الجمال غايه

ده الحزب في الشعب نضرب به المثل آيه

الصلب والسايل الاثنين سوا ياخي

تنظيم محمد فريد في كل قريه وحيٌ

بللوره بتشع بالثورة اللي يومها جيٌ

على اسم مصر.

العقد الماظ ورقبة مصر لايقاله

ضيٌع فريد كل أرضه عليه وأمواله

وفجأة حاكموه ويالله نفوه عن الأوطان

وحرب عالمية أولى ووفد م الأعيان

وثورة والانجليز انحطوا وانشالوا

مين اللي نظٌم فلول الشعب ده بحاله

ازاي جميع البلاد تنهض في نفس الآن

القاهرة اسكندرية منفلوط اسوان

وبعيد يا ولداه فريد مرمي وحيد شرقان

على اسم مصر.

السيمفونية اسمها الثورة على المحتل

سنة تسعتاشر اتعزفت في كل محل

تأليف محمد فريد ألفها من سنوات

وكتب لها النوتة بوق وبيانو وكمنجات

عزفوها من غير قيادته وجمعهم ما اختل

غير وقت صرف الأجور لما النفر ينذل

من وقتها وغلوشت نغمات على نغمات

وسعد زغلول زعيم مشغول في الانتخابات

يخطب ويضرب يابده يطبع البصمات

على اسم مصر.

وف أوضة عريانة فيها كل شيء بردان

رقد فريد وحده بالحمى والهـذيان

وقام وقف ع السرير في تلج المانيا

ينده يا مصر اسمعي اللي مفاق الدنيا

ووصيتي الثورة لاشتراكية والبنيان

ثورة بحق وحقيق مش حركة م الأعيان

ماتغمضوش عن وحوش الغرب ولا ثانية

ح تروح وحوش لنجليز تطلع وحوش تانية

وسقط ونطق الشهادة ونظرته الحانية

على اسم مصر أنا الذي مشيت ادوٌر باشتياق وحنين

على مصر .. والمشي خدني من سنين لسنين

لحد ماسنيـنهـا وسنـيني بقم واحد

وعاصرتها يوم بيوم لم فاتني يوم واحد

وحضرت شاهد عيان مولد وموت ملايين

مازعلت من كلمة قد البركة في الجايين

مين هم دول يا جدع .. ما توحد الواحد

البركة فينا وفي السامعين بالواحد

أنا قلتها بنرفزة .. من غيرة الواحد

على اسم مصر.

مصر الرمال العتيقة وصهدها الجبار

والنيل كخرطوم حريقه وحيد في وسط النار

في إيدين بشر نمل رايحه وجاية ع الضفة

فيهم مطافي وفيهم كدابين زفة

وفيهم اللي تعالى وقال أنا حكمدار

وكل باب م البيبان مقفول على اسرار

وكل سر بحريقة عايزة تتطفا

من أهلي تندهلي وتقوللي تعا اتدفا

أنا اللي عمري انكتب إلى يوم ما اتوفى

على اسم مصر.

على اسم مصر ارفعوا الانخاب واملولي

شدوا الوتر ع القمر يا شباب وغنولي

نسكر على حبها بالفن والاحساس

نسكر ودمع الحماس يملا لنا تاني الكاس

احنا يا حلوه الفدا بس اطلبي وقولي

يا سمره بعيون كده وسنتك لولي

وغنوه الحب تعلا ويسمعوا الحراس

يصفروا ويحضروا بفرقة طبول ونحاس

ويتقفل سجن مصر امام عيون الناس

على اسم مصر.

والمطبعة تدور وتخطف كل إيد منشور

عيش لسة م الفرن طالع ريحته ريحة النور

يا فلاحين يا جنود يا طلبة يا عمال

عدوكم حلف لاستعمار ورأس المال

عاش الطريق لشتراكي قوم يا شعب وثور

وحكمكم حكم اقطاعي عميل مأجور

عاش الكفاح بالسلاح إلى القنال يا رجال

خلوا حياه لنجليز المستقرة محال

والشمس نامت ليلتها وفكرها شغال

على اسم مصر.

القاهرة في اكتئاب والأنس عنها غاب

من عتمة تدخل لعتمة كأنها ف سرداب

أو قرية مرمي عليا ضل هجانة

الحظر م المغربية بأمر مولانا

ومصر في الليل بتولد والبوليس ع الباب

صبية ولاٌدة يابا ولحمها جلاب

طلع الصباح زغرطت في السكة فرحانه

على كتفها مولودتها لسه عريانه

وف لحظة كانت جميع الدنيا دريانة

على اسم مصر.

على كتفها مولودتها وتجري وتنادي

ياولادي من يوم ميلاد الأرض ياولادي

ينهض لها امحتب بدواه يقويها

وبنتاؤر ينشد الاشعار يهنيها

وسعد زغلول يكح يزلزل الوادي

وعرابي يهمس ومصر ترد بتمادي

تقوله آه برضه ثورة جيش وح احميها

بالدم بالروح بكل حياتي ح افديها

اما الأسامي معنديش غير اسمها

على اسم مصر.

مولودة كبرت وشبت في تلات تيام

من هبة هبت .. لثورة لبت الاحلام

والعرش عام راح ايطاليا بعيد ورا البراميل

يا هلترى دي حقيقة والا وهم جميل

ومصر من إمتى كانت حظها بسام

ظهر قميص العرق متشمر الاكمام

أنا شفته عقلي برق وبدأ لصاحبه يميل

نقشت له ف قلبي احلى وأروع التماثيل

بدراعي والمطرقة وبإيدي والأزميل

على اسم مصر...

» الدرس أنتهى... صلاح جاهين
» الشوارع حواديت ... لصلاح جاهين
» فيديو كليب القدس فيديو >>> مسرى الرسول ذاق العذاب
» قل :: قل لهم يا صلاح قلمي نور ونار ::.قل
» رباعيات صلاح چاهين