فِلِسطينياتْ مُبَعثَرةَ

فِلِسطينياتْ مُبَعثَرةَ

*
تعال يا روح ستك واقعد على جفوني
تعال أحكيلك عن أيام الطفولي
عن الهروب يا ستي من يوم
عرسي،
من دراي،من ترابي،من عبق شرفي.
حكوا كثير قبلي يا حبيبي
بس أنا،وآآآآآآآاه من انا
كلامي قليل ومجبول بالعنى.
كنت طفلة لسى خارطة وجهي وتقاسيمي خضرا
على رموشي نامت طبريا
وفوق خدودي غنت حيفا
كنت ألعب يا ستي بصفد وأروح على عكا،
تعرف يا عين ستك أنا بّذكر طريق دارنا
مليح؛
هناك عند الحاكورة،جنب البستان الأزرق
عند بيت أبو محمد
عمي هذا يا ستي.
إبْصر وين صارت دياره اسا يا روحي؟.
كنا صغار ونلعب بشَِعر بعضنا
نرسم صورة لليل ونغرس فيها الشمس
وكان الوقت يمشي خايف من أحلامنا، وعم يبكي.
والتراب براس الناقورة طعمه غير
حتى كلامه وسلامه غير.
والهوا وآآآآآآآآآآآآآآآآآآخ
من هبات الهوا لما تكون بجنين وتطلع على سوا نابلس
كأنك يا ستي صرت بروحين
روح الك وروح كرمال الوطن
ولما صار الطوفان!!!!!!!!!!
أبوي حكالي:
بغدرش يابا،الموت فوق حجارنا
كراما
حكيتله،

واللهي كأني لساني فيو هذاك الزمن؛
بحضن أبوي ببوس مرج خدود إمي،
وبغني
إوعا تحكي صوت ستك ما كان حلو
ما تضحك يا قلبي انه كانت ستك تغني وتغني
وتقول العتابا والميجنا
وتْرَقّصْ خصر رجال على كلمة أأأأأأووووووف
كنت أغني
لاكتب اسمك يا بلادي عا الشمس ال ما بتغيب
لا مالي ولا ولادي على حبك ما في حبيب
وكانوا الجيران يجوا يلتموا عنا
ونعمل سامر صباّحي
وأختي تقلي روحي نامي وأنا
أحكي لااااااااااااااااااا، ما بدي أنام
كان والله الي موقف وموقفي أقوى من كل زعامات العرب بخارجياتهم
خليني أمتع عيني بشوفة الخلان
خليني يا أختي قبل ما نتهجر عن وطن الأوطان

.
تصدق يا عين ستك اني كتبت على صفحة السما
أنا أرضي وأرضي أنا.
وأدرس بطولكرم وأروح على مجدّو
أرمِ شنتتي وألعب ببيسان ولما أزهق
أنزل على يافا،وأحكي لصحابي
زرتوا غزة يحكولي يلا، ما في ورانا شي خلينا نروح.
نتعب يا ستي ونروح نرتاح بالخليل نميّل على بيت لحم
ونسلم على أريحا ونبكي وانوح يا ستي
نبكي، نبكي
ترا القدس من يوم يومها
كانت ولا زالت
((((((((( جريحة )))))))))
.
أنا يا وطن كنت أمشيك باليوم ملايين المرات فوقالأسر
وفوق جبين كل من كان اله صوت.
وكان الزمان يغرد قبل العصافير
مجانين انتوا؟
تعالوا نزور رام الله
إم عيون زينة الله تحوم حولا وما شالله
إإإإإإإإإإإإإإإإإيه شو بدي أقول لأقول:
نسوانا كانت ولا بمليون رجال
ورجالنا كانوا أشاوس وجبال
وولادنا كانوا طيور على صدور الأهوال
وكلهم بحكوا وبرقصوا يا ستي على اغتصابنا
بفضوا بكارات بعضهم بابتسامة وضحكة وعهر
بناموا فوق صدر الكذب والاشاعات
وانا يا ستك
قلت للتاريخ تعال،،
حكيتله وانا ستك ترا نحنا أسود وأبطال
صحيح همي حكوا نكبة
بس النون شرف واستبسال
ولا الكاف محال وألف محال
والباء آآآه من مرارة الاستفحال
والتاء المسكرة يا ستي
ضاعت من شافت نذالة الأنذال
بضلوا يا ستي زعما وعرب وأجانب
وبنضل نحنا أسمى من الجبال
أنا
أنا
أنا
يا عيني صوت الحق تحت التراب،
أنا مو ستك أنا صرخة وطن لما يضيع بفتح باب
لضياع أشياء ما بعطيها غير الوطن
أنا صوت الفنن فوق خصر الصبايا
كلمة زمن بوقت ماله ثمن
رخيص لا بنشرى ولا بنباع

أنا يا ستي فاطمة

وكلامي ماهو كلام من دون رسم أفعال

عضو الهيئة الادارية نائب المدير

امل فلسطين

استمتعت بقراءتها خاصة انها باللكنة الفلسطينية

مشاعر كثيرة تنتاب كل من يقرأها

اختيار جميل من عضوة مميزة

مودتي

لول

حوار رائع نشعر من خلاله بالحنين للوطن والارض
جعلتنا نشتاق لزيتون وزعتر روح وطننا .

لهجة فلسطينية اصيله نشتاقها ونعشقها
نسرح من خلال كلماتها لماضي ارادو دفنه
ولكن الجدة فاطمة وغيرها كثر
ما زالو يحيون بذاكرتهم ليرسخوها فينا للابد

[ندعوك للتسجيل في المنتدى أو التعريف بنفسك لمعاينة هذه الصورة]