سجل كلمة من لهجتنا

[ندعوك للتسجيل في المنتدى أو التعريف بنفسك لمعاينة هذا الرابط]

[ندعوك للتسجيل في المنتدى أو التعريف بنفسك لمعاينة هذه الصورة]

سجل كلمة من لهجتنا

السنوات الاثنان والستون من شتاتنا قد اثرت بمجتمعنا الفلسطيني كثيرا

خصوصا اندماجنا بمجتمعات متنوعه لكل له

عاداته وتقاليدة ولهجته الخاصة .

وبايماننا بحقنا وتمسكنا بعودتنا زدنا تمسكا وعنادا في الحفاظ على بيئتنا

وعاداتنا وتقاليدنا وتراثنا الذي هو اثبات لهويتنا الفلسطينية وحقنا

ومن اهم هذه الامور هو لهجتنا (لكنتنا) الاصلية

التي هي بالنسبة لنا تراث وارث كبير علينا ان نحافظ عليها

وددت في هذه الصفحة ان نسجل كلمة من لهجتنا الفلسطينية الاصلية

وبعد ان لاحظت ان اللكنة اللبنانية .. السورية.. الاردنية .. وحتى الخليجية

اثرت على لهجاتنا المحلية ولم نعد نسمع

اللكنه الفلسطينة الاصلية ا الا من كبار السن وذلك يعود لسنوات شتاتنا الطويلة

وبعدنا عن وطننا الحبيبيب واندماجنا بالمجتمعات الاخرى

وحفاظا عليها سنحاول ان نعيد للهجتنا الاصلية اصولها

سنبدأ بكلمة او جملة ......

من قريتك وقريتي.....

من مدينتك ومدينتي.....

من كل مدن و قرى فلسطين الحبيبة......

والغاية هي المحافظة على هذا التراث العريق

الكلمة ومعناها باللغة الفصحى ليتسنى لنا معرفة معناها بلغتنا الاصلية

وشكرا لكم

اتمنى التفاعل من الجميع

وسأبدأ انا بكلمة من قريتي

صفورية الحبيبة

الساك : الجاكيت

المصطبه : الارض

بريموس:ببور

عضو نشيط *المزاج* : عصبي المزاج

السلام عليكم ورحمه الله وبركاته
دخلت احد المنتديات فوجدت موضوع عن لهجة القيسيه الموضوع كتبه الأخ الفاضل حسني البستنجي وأورد فيه الكثير من كلمات أهلنا في جبل الخليل وأكثر من 90% من هذه الكلمات لا زالت مستخدمة بين أبناء الدوايمة وذلك لأن أبناء الدوايمة رغم الشتاتإلا أنهم ولله الحمد كانوا مترابطين وكانوا يرحلون ويحلون معاً لا تفرقهم الغربة مهما قست عليهم ،،،، عندما قرأت الموضوع كنت أضحك لأنني أجد نفسي في لهجتي الأصليه ، ومن هذه الكلمات :

طابون :بركان صغير مصنوع من التراب والطين والقش وبتزبل على دايره علشان تخبز في وسطه بس شو خبز ولا احلى ويمكن استخدامه للشوي وهون لا ننصح بذلك لانك اذا بتوكل انت واولادك دجاجة رح توكلوا اربعة وتكاليف زيادة
سنسلة : مجموعة من الحجار مصفطات فوق بعض بشكل حلو على شكل جار طبعا بكون شكل الحجر غلط وما اله وجه فبيجي البنا وبخلعه ضربه بالشقوف او الشكوش فبيصير اله احلى وجه وهناك سناسل احلى من 100 صور ويعيش في السناسل الحيايا والعرابيد والفئران والعرس وفي بعض الاحيان البزاق .
خابية : عبارة عن مكان علشان تخبي فيه حيث كانوا زماااااان اثناء بناهم يصنعون الخوابي للخزين وتخبية ابصر ايش شغلات يمكن سمن او زيت او تمر او زبيب ما بعرف المهم بيخبوا اشي
يتدهده : يتعدى نقول فلان تدهده علينا اي فلان تعدى وتفلسف علينا وهون وجب اخذ جاهه وعطاوي وما الى ذلك وبالاخر فنجان قهوة ووجهك عليها
حادر من انحدر وحادر اسم الفعل منها وتعني باللغة تحت يعني مثلا : شوف يا ولد ابوك حادر اي روح يا ولد شوف ابوك تحت وبعدين اريح باللفظ
عزيات : جمع عزا وتعني الميتم وتصرخ الام على ابنها لما يسم بدنها وبتقله بصوت عالي عزياااااااااااااات يلدحن في امك وهون بيكون عندها قمة سمة البدن ومش شايفة الفضى واذا بدها تلطف الجو بتحكي عزيات يعزن باليهود
لدحات : برضه من صنف عزيات وغراب البين وغراب النقعي يعني من نفس العيلة وتعني الاندهاش بزعل وحرقة
منساس : عود طويل وراسه شعبتين علشان يمسكه الحراث وهو ورا البغلة او الحمارويضغط به على فرد الحراث وهو نوعان الاول طويل للبغال والثاني قصير للحمير
تلم : لما يشق فرد الحراث الارض نصين بيكون هذا الشق اسمه التلم ولما يحكي الحراث مع الحمار بيصير قله : تلمك ..تلمك علشان يقله انه انحرف عن مساره فهون الحمار بيرجع كيف بعرفش
نير : يقال نير دوالي او نير شجر او فلان اله بالارض هاي نيرين هنا النير تعني سطر عمبرى بعضه اكثر من هيك بقدرش اوضح
شرك شراك : بيكون في منطقة في الحراث صعب انو الدابة توصلها فبصير يشرك تشريك فيها الحراث وهون بيكون قرب يخلص سرحته
دورك : يعني بدك تنقل دالية متر او مترين او بدك تقرب جذعها لماسورة المعرش تعمل جنب الدالية نفق بعمق نص متر على الاقل وبعدها بتحط فيه الدالية المزروعة اصلن وبتمدها لوين بدك
هوده : هود فلان علبسكليت هلحين يعني نزل وهوده نزله
حماط :وتعني التين ويقال عن شجرة التين حماطه

طرمبيل: سياره.
الشلق: وهو عبارة عن عودان حطب تستخدم في تسهيل عملية التوليع للنار.
السحاحير: حمالة الجحش وهي مصنوعة من الحديد.
الحواة: اللي بنلفها حول رقبة البغل او العمبرى : وهي كلمة مدغمة بالاصل عن برى
ويقصد فيها بمحاذات او مقابل فعلى سبيل المثال
لما تكون طالع مع شوفير تكسي ما بسمع الا الحجة الي جنبك
بتقول : يمه يالشوفير وقف نزلني عمبرى الوكنجي ابو صبحي .

يقطع طناها الي خلفتك : الطنى هو الضنى ويعني الخلفة والاولاد
ولكن يقال هنا طناها للتخفيف من صدمة المسبة والدعوه لانه اذا قيل
يقطع طناها بوكل هوا .
خمش : خمش يخمش فهو مخموش واسم الفاعل يدل على الفعل
وهنا تعني قضم او قرش اخمش شوي من التفاحة تعني اقضم او كل شوي
منها .

حردانة : يقال فلانة حردانة عند اهلها اي فلانة متطاوشة مع بعلها
وحردها اي روحها عند اهلها وهنا يكون فعل الحرد مؤقت حسب عقلات
اهل الزوجة وكذلك حسب عقلات اهل الزوج .
اذن الحرد هو الحرن او الزعل او ترك الشيء وبكل مقام مقال حرد عن الاكل بطل يوكل

مطرح : مكان عندما يريد انسان بشري من انسان اخر ان لا يغادر مكانه بيقوله
تتحركش من مطرحك هاظ يعني لا تتزحزح .

الحواش : عندما تسمع فلان قصر حواشه
يعني ان فلان جاب قصير علشان يقصر طفطاف الدار
الحواش اذن بعد ان تبني الطابق الاول وتعقد السطح تبني مدماكين او ثلاث او اربعة
حول السطح خوف الصغار يتبنقلوا تحت وهذا اسمه حواش ليحوش سطح البيت

اخوتي الاحباب مرت كلمات كثيرة سنترجمها الى اللغة العادية فيما بعد
قصر . طفطاف , تعقد , مدماك . يتبنقل حمار وقت الحراثة.

( حسني البستنجي )

03-18-2010, 10:59 AM

حط : حط البكسة عرق الدالية
اي ضع الكرتونة او الصندوق الخشبي بجانب شجرة العنب
ويقال للانثى حطيها اي ضعيها .

البكسة : بكسة العنب اي صندوق العنب او كرتونة العنب واحيانا يقولوا البروز
او بروز البندورة مثلا
عرق : بكسر العين والقاف تعني بجانب او بالقرب من

دشره : اي تركه يقال راح الابو ودشر الاولاد لامهم المسخمة
اي ترك الاولاد

المسخمة : اي المسكينة او المسخم المسكين
وتقال للكناية عن الطيبة والمسكنة
واحيانا يقال المسخمطة باضافة الطاء . وتحمل نفس المعنى

قفة :وهي وعاء من الكاوشوك تستعمل في عزق الحجارة من الارض
عزق: رمي بعيدا اعجزق الحجر اي ارميه بعيدا وعنا في حلحول اول ما نفكر في العزق بنعزق على اقرب جار النا
نتشه وجمعها نتش وهو الشوك.
نسري : ماخوذه من السروه وهي الذهاب الي مكان ما في الصباح الباكر
نسرح : وهي الذهاب الى الارض لمداوله الاعمال الزراعيه المختلفه
حاكوره : وهي الارض الصغيره وجمعها حواكير
الاسفلت : وهي الطريق المعبده
الدابه : وهي الحيوانات الاليفه مثل الحمار والبقر وجمها دواب
الرظف : وهي حجاره صغيره توضع في الطابون حتى تتم الخبازه عليها
العليه : وهي السده ويوضع فيها تمويل الشتاء
تلا : وهي بمعنا جنب الشيء
تكتيكه : وهي الدراجه الناريه
( يقال ان فلان سند على الحماطة يقحف الدحي )
اي ان فلان تسلق التينة الكبيرة ليوخذ الدحي يعني العش تاع العصافير
وفي كمان كلمة( دِس ): يعني دخل زي دس المصاري في جيبتك

وكمان كلمة مشهورة جدا وما في بكل العالم شبيهة الها او حد بعرف معانها الا اذا كان من اصل حلحولي او نسب حلحولي وهي كلمة( بنج ) اي معناها للي ما بعرف البرقوق زي روح يا ولد لقط البنجات خمّجن على قد ما قلتها لناس من محافظة الخليل ومن المحافظات الثانية ما حد عرف معناها لأنها حلحولية اصيلة
( الطرمبيل )كانو من زمان يقلوها معناها السيارة
( الجاروشة ) اللي هي مطحنة القمح المصنوعة من حجار الصوان على ما اعتقد
وهذي الكلمة اخوي بأمريكا فطني فيها هي
( الطنطّشة ) اي اعلة الاغصان في اي شجرة
وفي كمان ( شمّر ) اي رفع ملابسه
كمان ( القرطلة ) اي السلة المصنوعة من القش
تنسوش انه كانت لما تصير الساعة 7:00 المسا كانن العجايز يقولن عنه نص الليل

حزمق : وتقال حزمق يحزمق فهو محزمق
وحزميق
يقال والله ابو علي محزمق على الاخر وملتعن ابو فاطسه

هنا محزمق يعني معصب ومش شايف الفضى اي غضبان من امر ما
هشت : هشت يهشت فهو هشات
اي بقص قص يعني بكذب او بتخوث
فعندما يقال فلان هشات اي كذاب او كلامه غير صحيح
خرط : ولها اكثر من معنى : اولا من عائلة الهشت والكذب , فلان خراط صيغة مبالغة
كناية عن كثرة الكذب والهشت
خرط : يقال ايضا خرط الملوخية او خرط الكوسا اي فرم وقطع
خرط : يقال احيانا خرط الشاي اي دبغ وصار لونه غامق شاي مصري بالستينة
خرط : احيانا يقال حطيت الالجاجة بالطنجرة وخطت ميتها اي وضعت الدجاجة في الطنجرة
على الغاز و خرج منها الماء .
ومن اقدم الهشتات والخرطات : ما يلي
بقلك انو فلان زرع ارضه ملفوف وكبر الملفوف لحد ما صارت عملاقة وبقلك راح عليها
الختيارية 5 منهم قعدوا فوقها واتربعوا على الملفوفة واتغدوا .
وبقلك كمان احد الخيارية ولع قرمية شجرة كبيرة واجا عليها بعد سنة لقيها لسه مولعة
ما علينا
عزا يلدح باليهود شو هالخراف هاضا

مزط : يعني بيقولوا
والله فلان قلنالوه ساعدنا عونة قام مزط
يعني فلخ هرب تركنا وما ساعدنا

احذاكم : في احذاكم سكر كالعادة باب داركم بطق 6000 مرة
كل شوي ولد صغير ... حذاكم طنجرة صحن حبة لمون شوية عصفر .... الخ
المهم حذاكم يعني عندكم

عونة : فلان عنده عقده عونة يعني
فلان مفلس زي حالاتي وبده يعقد بس ببلاش
فبطلب عونة من الاحباب وبعقدوا معه البيت بدون اجرة
ببلاش

بالطوش بيقولوا :
فلان كتل فلان كتله وخمعه كف طير وجهه وخلع نيعه
ومرمغه بالتراب تمرمغ .
طوش : يعني مشاكل والله وكيلكم بتبلش باولاد صغار وبتكبر وبتوصل العطاوي
كتل :هي اصلها قتل بس بيقولوا كتل للتخفيف من كلمة قتل فبتصير ضرب اهون هيك
كتل يكتل فهو مكتول
خمعه : خمع اي هنا تعني ضرب بس اصلها بيحكوا فلان ما مد ايده على الشتلة الا هو خامعها
اي قالعها او كاسرها
وقيل هنا خمعه كف للدلادة على شدة الكف وقوته يعني الاصابع علموا بوجهه

خلع : معروفة قلع او اخرجه من مكانه
نيعه : بيقولوا وجع يخلع نيعك يعني النيع هو الفك او احيانا الوجه
مرمغ :اي حاس وايضا حاس كلمة جديدة وهنا مرمغ اي فعفل اي مسح به الارض
ودحدله في التراب
اذن
حاسه او فعفل او مرمغ كلها متشابهة بالمعنى وتقال عند الغضب للدلالة على شدة المباطحة
والطوشة

شلع : يقال هنا فلانه حملت ابنها برخاوة شلعتله ايده
اي خلعت يده او عملت له تمزق بالاربطة والعضلات في منطقة الكتف
او فلان شلع ابنه كف : اي نفس الكلمات يلي بالحارة الفوقة اي فاجأه بكف صامت
قلب به افكاره وخلاه يترنح .

بس للتوضيح
مرت معنا كلمة حاس اي مرمغ ومسح به الارض او طرحه على الارض وحركه .

بس في الها معنى ثاني :
لما الزلمة يروح من الشغل ملتعن ابو فاطصه
بتقله مرته اقوم احوسلك شوية بزر كوسا
لانه الكوسا المحشي غدا بكره والبزر يلي قورته بحوسوه وبتغدوا عليه
قبل يوم
اذن حوسة بندورة او حوسة لحمة ( بعيد عنا ) اي تقلي الكوسا او اللحمة بالمقلاة
وعملية تقليبها تعني حوسه .

قورت فلانة الكوسا : وتقال نقر او حفر او قور فلان مناخيره انسوكوا منها
وهنا تعني ان فلانة قد حفرت الكوسا واخرجت ما به لتبقى الطبقة الخارجية حتى تضع
بداخل الكوساية زر واحيانا مع لحمة .

اللبش : هنا قورت الكوسا حتى تخرج اللبش او الحباش يلي جواه
تعني الزوائد او الامور الصغيرة المتنائرة

حبول
ارض بور
ارض وعرة
الامَاية ( هذه اللي بعلموا فيها حدود الأرض)
مفجية( بنقول افجت الدنيا يعني وقف المطر)
حبول : وجمعها حوابيل بكسر العين
وتعني الارض الصغيرة والرفيعة الطويلة ما بتنفع الا لنيرين او ثلاث دوالي بس
وما بيزبط فيها بنى وعادة بعطوها للبنات من ميراثهن لانهن صغار .
أرض بور : يعني بور قحط وبور بالانجليزي فقير
وارض بور يعني مهجورة لا محروثة ولا مزروعة وكلها نتش وغنم آل الب .... بسرح وبمرح فيها
ولما تشوف ارض بور في حلحول اعلم علم اليقين انو اهلها واصحابها في عمان او بره البلد ...
ارض وعرة : يعني ارض مش سهلة وتكون كلها دبش وطلعات ونزلات وطور واحيانا بيقولوا
طريق الصفا وعرة يعني مش مزفته وبيقولوا لما واحد بدو يخطب وحده وبشاور صحابه عنها
فبحكولوا : سيبك من هلبنت طريقها وعرة , يعني ابوها واخوتها حميلة مواس واولاد عمها رح يتعرضوها وايدهم والهواه .....
الاماية : وهي مأخوذة من كلمة الام
والاماية هي الوتد او العلامة لحدود الارض , ويتفنن البعض عندنا بعمل شفتنغ وتحريك للامايات
فاذا كان لكم جار خبير امايات فاعلم ان امايته ستصل الى نصف ارضك .
وكما وتتنقل الامايات لما يكون الجار بالارض مش موجود يعني مغترب فهنا الاماية بتسرح وبتمرح
وما بيروح المغترب من غربته الا الارض قافطه اي مصابة بجفاف ....
مفجية : يقال افجت الدنيا
هنا تقال في عدة مناسبات , فاذا كانت مطر يقال افجت اي توقف المطر
واذا كانت ضباب او غطيطة تقول افجت اي زال الضباب
واذا كان الوضع صعب يقال افجت اي فرجت
قزيلي : قزا يقزي والامر منها قزي
وقزي تعني ابعث فمثلا : الزوج بيشوف ابنه بالشارع
فبروح علدار معصب ... وبصيح انوه قزا الولد علشارع
فبترد عليه مرته : انا قزيته عندك مشكلة
فبقلها : لا بس حبيت اعرف ..............
اذن قزا يعني ارسل او بعث او ودا
ودا : وَدّا اي ارسل من عائلة قزا
وهناك ثلاث صفحات سيقوم الاخ الغالي ابو عمر بارسالها الي
لوضعها في الموضوع تتعلق بالمصطلحات الحلحولية منها

جهجهون : بقلك اجا البليط ورشق البلاطات بالحمام على الجهجهون
اي شلفقة بشلفقة او على الفاضي او على الماشي او بدون دقة
كما قلنا شلفقة هي من نفس عائلة جهجهون .......

قماط : قِمَاط هو رباط او حبل
بيقلك لما واحد يعمل عزمه ويقول لفلان تعال انت ومرتك تغدو عندنا
فشو بيعمل الافندي بيجيب مرته واولاده وكل العيلة ويمكن شوي من الجيران
فتتقف ام الرجل الي عازم وبتقول : شو جايب معاه الصغير والكبير والمقمط بالسرير

اذن القماط الحبل وهو حبل يربط به الطفل الرضيع الصغير لانه لما ينولد ولد صغير
بيكون مجعلك فشو بيعملوا الحجات بلفوه بملايه وبلفوا الملاية بحبل ( قماط ) علشان
يثبتوا ايدين ورجلين الولد حتى يصيرن دغريات وطبعا بنشل امل الطفل ممنوع الحركة لا يمين ولا شمال وبيقلك هاي الشغلة بتعمل عنده عصب قوي واذا ما تربط بيطلع رخو

السِعِن : بيقلك فلان شرب مي كثير بعد الفطره وصار بطنه يلق مثل السعن
السعن هو عزا والله نسيت برجع بكتب تفسير للسعن والشكوى
(( السعن وعاء من الجلد يوضع فيه اللبن ويربط وتخضه النساء بشدة حتى نحصل على الزبدة واللبن الزائد يتحول إلى مخيض نشربه ( شنينيه ) ،،،
ميظه : مَيْظَه
رَيْعَه
الكلمتان تحملان نفس التفسير
بقلك دخل ابو العز على الدار مطنقره معاه وعمل الدار ريعه او ميظه
يعني خربطها
اذن غير مرتب او مخربط او بلوزه
مطنقر : يعني معمي ضوه من العصبية او مش شايف الفضى
يعني زعلان من الاخر
حانوت - دكان او سوبر ماركت
إخص : إخِص عليكيعني يا عيب عليك يا حيف علرجال
السِعِن : هو مصنوع من جلد الغنم ويستخدم كقربة لوضع الماء فيه
وكما قلنا كانوا زمان ينقلوا الماء من العيون والابار الارضية والينابيع
وقد كان هناك اقتصاد باستخدام الماء مش مثل هلايام دش واحد بدك خزان

وبيقولوا : بطنه بيلق مثل السعن
كناية عن واحد شارب ماء وسوائل كثيرة فيتحرك الماء في معدته بشكل ملحوظ
المهم
الشكوى او الشراع : كمان مصنوع من جلد الغنم ويستخدم لخض الحليب
وينتج عنه الزبدة ولبن المخيض وكمان بيصنعوا الجبنة واللبنة واللبن
كانت هذه الطرق افضل الاعمال التي يقوموا بها زمان ليقتاتوا منها
لَبّط : لبوط , ملبط
بيقلك اذا واحد صار يخبص بالحكي فبيقلولوا لبط او انطمر
وفي بعض نسوان لما تقلي بالمقلى ما بتجليه منيح فبكون الزيت ملبط فيه او مملتح
او لما لما يمون الواحد بيجبل طينة بيقله : ناولني لبوط طينة

المهم طلعنا بنتيجة انو لبوط تعني تجمع او تكدس شيء
ولما تحكي لواحد لبط يعني انخم او انطمر اي اسكت
طِلِق او عِرِق
تعني فرع وتطلق على غصن من اغصان النباتات او الاشجار
فمثلا بقلك : اطلقت التينة يعني فرعت او نبزت او بلشت تفتح
او مثلا : طلق دوالي يعني فرع او غصن دوالي
ومثلا : بقلك هات عِرِق نعنع من جنب ماصورة المطبخ
يعني هات فرع او طلق نعنع .
واحيانا كلمة عِرِق تعني اشي ثاني
بقلك : واحد ماسكينه الجيش وهو مروح من السراحة فبقلهم
والله يا خواجا نسيت هويتي عِرِق الحماطة
فطبعا بظلوا يطسوا فيه لانهم مش فاهمين
تفسيرها
عِرِق الحماطة : اي جنب شجرة التين
عِرِق تعني : جنب او بمحاذاة
الحماطة : تعني شجرة التين او الدافورة او التينة .
السراحة : اي الذهاب الى الارض صباحا بعد صلاة الفجر للاعتناء بها
من تقنيب اي تقليم الاغصان
اومن رش او حراثة
وفي عندنا حج قرابة النا من كثر ما بحب الارض والسراحة مرق عنا الساعة

بالليل كنا سهرانين بالشارع , سألناه وين رايح يا ابو محمد لهو بيقول
رايح على السراحة .... عزا شو مقومكم بدري
هو بفك انو الساعة 5 صباحا ومش عارف انه اللي اذن هو اذان العشا مش الفجر
ما علينا
تقريطة : اي التهاب دوزنطاريا او اميبيا
بقلك ... فلان معه تقريطة ومش قادر يعلق على رجليه
مغص واسهال وامساك احيانا اخرى
شوية جعده بتحل الامور او بمرسوا لبن جميد وبشربوه

مُوثّب : او وثاب
فلان راح على علان علشان يقطعله وثاب او فلان موثب
كيف ووين
هاظ يا اخوان في عرق في الظهر بمسكوه بالاصابع وبشدوا عليه
لحد ما يذوب زي ما بيحكوا
والوثاب سببه حسب اعتقاد الكبار اما اكل على جوع او برد او زعل او خوف
وبسبب الم ومغص شديد وصداع والم في الظهر .

مُلَقّم : بقلك فلانة بتحكي عن زوجها بطل يسحب بالاكل
ما بيوكل الا جاطين رز مع انه كان زمان يسحب سدرين رز على وقعة
فهون التشخيص الطبي الحلولي بيقول انه ملقم
الاعراض .. ببطل يوكل منيح وبحس انه شبعان وبحس في اشي مدقر براس معدته
العلاج .... سحب اللقمة
الطريقة .... بتروح عند الحجة ام محمد الصبح على الريق قبل الفطور
وبتصير تمرج راس معدتك بالزيت باصابعها وتدلت من فوق لتحت وطبعا انت بتصيح من الالم
مدة العلاج ... 3 ايام او حسب حجم اللقمة

بس بحب احكي رأي الطب بالموضوع او رأيي انا :المريء عبارة عن عضلات حلقية او دائرية تقوم بدفع الطعام الى المعده عن طريق
الحركة الدودية حيث تنقبض حلقة وتنبسط التي بعدها لتندفع الى الاسفل
فبكون اخونا الملقم ماكل لقمة وهره يعني رطلاوية ومن كثر ما هو جوعان مش ملحق
يهضم ويهرس الاكل باسنانه او حواليه حيتان بيوكلوا معه فبدو يلحق حاله بالكل
فهاي اللقمة الكبيرة بترض حلقة من العضلات او فتحة المعدة فبالتالي عند عمل تدليك
نقوم بعمل مساج لفتحة المعده وبالتالي بتسلك الامور والله اعلم .

في : شرقة , زقزوقة , شهقة , مشري , ملوح , محوقي , مصودد , تشرزان , كريزة ........

شرْقَة : او شَرْقَان
بقلك فلان شرق وكانت بدها تطلع روحه
يعني زور او زوران
اي ان هناك بعض من الطعام او الشراب قد دخل الى
مجرى التنفس بدلا من المريء
واحيانا الشرقة لما بكون الواحد بيوكل وبحز في ناس يعني
بجيب سيرة ناس بالعاطل ... فبشرق
فبقلوله : ايوه ابصر شو كنت بدك تحكي ......
اذن دخول الطعام لغير مجراه وبالتالي تحدث عنده سعلة متواصلة لطرد هذا الطعام من
دمجرى التنفس .......

زَقْزُقَة : والله ماني عارف كيف بدي افسرها
علعموم اعتقد ان اسمها بالفصحة الحازوقة
بيظل الواحد يعمل هئ هئ هئ هئ
هاي لما الواحد يكون عطشان بتصيبة شهقات متتالية او لما يزْوَر
وهو بيوكل بيصير يزقزق .

قَرقومْ

كانوا زمان عندهم ابريق الشاي من الفخار
وطبعا بعد مده تنكسر ذانه وذانه الثانيه
وينكسر بوزه يقلب زي الوعاء
فكانوا ما يرموه كل اشي اله فايده
كانوا يحطوا فيه عدس او بذور
هاظ اسمه القرقوم
كان يقال (( هات قرقوم العدس يما ))

المِقِرْ

وهو عباره عن حفره بصخره وتكون طبيعيه
ولما تمطر بتتعبى مي بتصير صالحة للشرب
ولا مية صحه
وكانوا الرعاه يشربوا منها لما يكونوا يرعوا الغنم
فيقال (( في ميه في هظاك المقر نظيفه ))

شهقة : هو سحب نفس وقطعه مع اصار صوت هئ او يئ
وبقلك فلان شهق شهقة الموت يعني اخر انفاسه
وبقلك انو فلان شهق في واحد جابه الارض يعني حسده

هاظ باقي بالزمانات على ايام اجدادنا باقي واحد شهقته والقبر
المهم كان قاعد ومعه ناس فمر عنهم قطيع من الجمال
فقلهم شو رأيكم توكلوا من لحم الجمال
فشهق شهقة وقلهم الحقوهم
فلما لحقوا القطيع لقيوا انو في جمل مبنقل وبالفعل اكلوا من لحمه

الجَهارينْ

وهو نفس
المِقِرْ
بس اكبر منه
حفره كبيره بالصخر تتجمع بها المياه
وكانوا الرعاه ياخذون الغنم والبعير لمناطق تكون
قريبه من جهارين عشان يشربوا منها

نِتْفَه : يعني شوي صغيرة
قطشة : تحمل نفس المعنى شوي صغيره
بقلك الام بتحكي لبنتها
روحي حطي نتفة كاز بقاع القنية علشان ندهن شعرك
كانوا يستخدموا الكاز لتقوية جلدة الراس ( اعتقد فاهمين علي )

في كمان نِتِف : يعني جلده او كحته يعني بخيل
بقلك فلان نتف كحته ما بيطلع من ريشه ريش
يعني كناية عن البخل والنقاصة .

نَتَف : مَعَط : يعني خلع او ازال او سحب بقوة
بقلك فلان دبح الديك ونتف ريشه او معط ريشه

مَعِط : زي ما حكينا قبل
بس كمان تعني خَرِط وكذب وقص او فشخره
بقلك فلان بلش يمعط
يعني بلش يكذب ويتفشخر ( تعني يتفاخر )

حسني البستنجي

03-18-2010, 11:05 AM

هَرْعي او هَرْعِتٌه او هَرْعُتُه او هَيّوهاو هيو
تعني هناك
مثلا : وين ابوك يا ولد ؟؟؟؟ هاظ سؤال
الجواب من الولد : هلعيته هناك ( طبعا الولد بقرط بحرف الراء )

هَرّي :لما تكون حامل اغراض بايدك وتمر من جنب جارتكم الفضولية
بتقلك : هَرّي تاشوف شو معك ..هَرّي

يعني الست بتقلك فرجيني شو معك او ارني ما بيدك من اغراض ياللهول !!!!

وذف: يعني بيكول كتير وطريقة الاكل مش منيحة بالعربي(مفجوع) هههههه ما تسألوني كيف عرفتها بس ما تخافوا مش انحكت الي ههههههههه

حذاكُ؟ : يعني عندكم؟ ..هل يتوفر؟؟

وخري: مـتأخر
وخري: ابعدي
ابحزي : ابعدي
بحزيلي : اعمليلي مكان جنبك اقعد فيه
بحطت : قعدت وما قامت من ماكنها

جلدة : منطقة ما . او موقـع جغرااافي صغير الحجم

ذوح : يتلفلف او يتسكع او ( رايح جاي )

خوصة : سكين

الحماطة : شجرة التين

دغشة : بكرا

هريعيتو : للأشارة لشيء معين .. عن مسافة بعيدة

هذول الي متذكرهم حالياً
واحلى موضوع يا ابن عم

بغمى علللليك غميااان

يأ الله لا يتيرلك وانا شولي منسيني هاااظ

المسخمة : اي المسكينة او المسخم المسكين
وتقال للكناية عن الطيبة والمسكنة
واحيانا يقال المسخمطة باضافة الطاء . وتحمل نفس المعنى
؛؛؛؛؛؛؛؛؛؛؛؛
انتهى كلام حسني البستنجي ؛؛؛

(( كلمة مسخم معناها عند قرى شمال فلسطين مختلف عنا )) يعني معناها عندنا زي ما نقول (سخموا باله) ومسخمه يعني (سخموا بالها) هذا المعنى عند أهل شمال فلسطين مثل جنين مثلاً ،،،،
وكلمة مسخم مأخوذه من السخام وهو السكن ( يعني الشحبار ) قصدي الشحار وهو السناج الناتج عن دخان النار على أواني الطبخ (( السواد اللي على قاع الطنجرة )) لأنه الطبيخ كان على الحطب ،،،،،

شكراً لك يا أمل ،،، وتحياتي لأهل صفورية ،،،

احمد الخضور

يعطيك العافية
اضافه رائعه ومفيده
فعلا الترابط بين اهالي القرى يساهم بالحفاظ على اصالة اللهجة
كما سكان المخيمات

حاولت ان ابحث عن كلمات مشتركه بلهجتنا بين قريتي وقرية الدوايمة

نِتْفَه : يعني شوي صغيرة

بحزيلي : اعمليلي مكان جنبك اقعد فيه

عرق : بكسر العين والقاف تعني بجانب او بالقرب من

اعود واسجل كلمة من صفورية

حنفية = " صنبور " ...

مية متلجة = " مياة مثلجة " ...

ورا الدار = " خلف البيت " ...

خطرة = مرة

خطمط= مرقت= مررت

تحياتي لك

امل فلسطين

الله يا بنيتي يعلي مراتبك وتصيري ريسه عاصحابكي
ويرضى عليكي السنه طول

طمنوا ستي ام عطا بإنه القضـية من زمان المندوب وهي زي ما هية

لسـة بنفاصل القنـاصل علـيها زي ما بتفـاصلي ع الملوخـية

لكـن اطمـني وصـلنا معاهم بين ستة وستة ونص في الميـة

بطلـع لهم يا ستي حيـفا ويـافا ولنا خرفيش وسيسـعة بـرية

ولنا دولة يحرسـها طير السـنونو يا ام عطا ولبسوه رتب عسكرية

والسنونـو إله نمو اقتصـادي والسنونـو إلـه خطط أمنـية

والسنونـو عم ينبذ العنف ويعلن إلتزامـه الكـامل بالاتفــاقية

ولنا برضه يا سـتي سجـادة حمرا تالسنونـو يأدي عليها التحـية

والنـا قمة يدعـو إليها السنـونو يعقدوها في الجامـعة العربيـة

حيـوا برج الحمام وحيوا حمامه من ملوك المحبـة والأخــوية

يا حمـام البـروج ويا مواليـنا يا دوا الجـرح ويا شـفا البردية

يا شـداد الخطـر على أعـادينا وحبكو إلنا حب قيـس للعامرية

راح أقول اللي قالوا طوقان قبلي أخو فدوى وبن الأصول الزكية

في يـدينـا بقيـة من بـلادٍ فاستريحوا كي لا تضيــع
البقية

المدير العام العمر : 59 *المزاج* :

عوافي
]

» كلمة للأقصى
» كلمة أحبك بـ 28 لغة
» معنى كلمة(ببسي)..............؟
» مامعنى كلمة رمضان
» ما معنى كلمة أحبك؟؟؟